أبو سمير المصري: فبراير 2013

الأربعاء، 6 فبراير 2013

رباعيات كريستي

إنتي ورداية ربيع

درة فوق راس الجميع

فيكي من ربي هدية

وحلم مش هاقبل يضيع

دانتي أم وحضن بيت

ياما جواه اترميت

فيكي احساس بالأمان

مهما في ترابك قاسيت

مهما هايعلوا المزاد

ع الاراضي وع الولاد

برضه هانغني بلادي

انتي غايتي والمراد

إنتي ترنيمة في آذان

ضحكة رايقة في 100 مكان

سكة آه ماخترتهاش

بس عاشقك مهما كان

انتي حارة وقصر واسع

شط ياما بموجه دافع

عن حكايتك قال روايتك

ساكنة مليون قلب خاشع

في الكنيسة وفي الجوامع

ألف عبد وعبد سامع

صوت نداكي وقال فداكي

صدورنا قدام المدافع

مصر يا أم الشهيد

ودعيني بفرح عيد

كفنيني بطرحتك

وإحلمي ببكرة الجديد

باقية بلدي ومش بلدهم

زلزلي بنيلك مكانهم

نزليهم من عروشهم

وإروي قبري دموع ندمهم

أبو سمير المصري